2020五個SEO文案小技巧

唔經唔覺又到831,2020年已經過左三份之二。過左成年,大家還好嗎? 隨住網絡技術同人工智能既發展,SEO技巧係2020年都有好大既改變,等我地介紹五個SEO文案寫作小技巧,當中唔會有寫程式既成份,純粹玩字。如果你都覺得內容推廣(Content marketing)好緊要既話,就要參考下啦。

  1. 關鍵字研究
  2. 問答形式寫作
  3. 列點形式寫作
  4. 引經據典列明出處
  5. SEO文案結構

關鍵字研究

所有寫SEO文既朋友第一件要識既野,一定係研究關鍵字(Keyword research)。唔好以為「研究」一定好難,SEO關鍵字其實只係搵出大家用乜野字眼去Google搜索,例如你諗住寫文去升網站SEO排名,咁好自然就會上網搵「SEO文案技巧」,我作為寫手,就係要搵出大家用乜野字詞句子。

睇落有啲抽象,其實最幫到手既工具就係Google。我地可以先用Google搵下最基本既字眼,咁Google大神就會有三個地方俾到提示:

  1. 自動完成 – 我地輸入時,你會見到Google會嘗試自動完成(Autocomplete)搜尋關鍵字,揀得呢個字,係因為有唔少人搵佢,mark低。
  2. 相關搜尋 – 結果返來會俾埋建議相關搜尋(Related search),例如我地搵「SEO文案」後,Google就會建議試下搵埋「SEO文案範例」、「SEO文章架構」
  3. 結果網頁 – 排得頭3名既網頁,我都會鼓勵你入去睇下,唔好淨係睇個標題同meta-description,呢3個網頁一定有過人之處,先會被Google排係最前。

關鍵字代表左人想要既野,記著,如果你要SEO做得好,關鍵字正如其名就係關鍵,你要俾到搵野既人需要既資訊同答案。我係《SEO文案成功案例》都有講過,客戶好多時都係搵「BUD顧問」、科技券顧問」呢堆字,只要輸入Google,就會再有另一堆相關既字句,例如「BUD成功案例」、「科技券成功例子」等等,加以運用,就推高SEO,做埋精選摘要 (Featured snippet)。

問答形式寫作

話說2020年係語音技術(Speech recognition)重要既一年,語音搜尋(Voice search)同智能助理(Smart assistant)係西方大行其道,越來越多人會直接對住部電話問問題搵野,例如以前成日入一堆名詞(可能係「SEO文案技巧」),而家就會直接問:「點樣寫SEO文章?」。所以我地寫文時,就要識得圍住5W1H去諗內容(即係Who邊個、What乜野、When幾時、Where邊度、Why點解同How點樣),之後設問,自然更滿足到讀者既需要。

雖然我話過唔會寫技術野,不過都想介紹少少技術知識俾大家,呢樣叫做Structured data (結構化資料)。Structured data係一個標準化格式,俾Search engine容易理解網頁內容,其中一類叫做「FAQ」(常見問題),做網頁設計時用FAQ schema,對SEO有一定幫助。WordPress既SEO plugin Yoast已經有相關工具,唔使識寫程式都做到架。1

列點形式寫作

除非你考緊試,規定左要用段落形式答題,否則大家都應該覺得睇Point form (列點)會舒服啲。Google好聰明,明白人類既喜好,都會想文案多啲用Point form既。大家固然可以用List (<ol>或者<ul>),或者善用Header tag都可以。好似我寫「科技券成功例子」時,就將10個例子各以<h2>(副標題)標明,Google好快就get到,網頁仲上左做Featured snippet。

有時我地未必可以將成篇文分成列點,因為唔係所有文都係「10個例子」「八個明解十四個堅持」咁分得清清楚楚。所以有時就係文入邊用列點,例如我地呢篇文「關鍵字研究」其中介紹Google俾既提示時就用左列點。我想強調既係,所有網頁文案元素都應該有條理咁運用,唔好為做而做。

引經據典列明出處

如果大家寫過學術文章,教授第一樣教既都會係點做Citation(引述),因為學術界好重視誠信,抄襲(Plagiarism)係大罪,所以如果你用左人地既野,一定要寫明出處。文章要得到讀者信用先會有好既SEO,無人會鐘意睇內容農場(Content farm)既野。引文時,最好有埋官方連結,好似我最近寫左篇關於澳門經濟既文章,用左澳門政府統計暨普查局(Direcção dos Serviços de Estatística e Censos)既數據,都會寫明出處,俾埋官方連結既。

可能你會諗,加左連結去其他網站,咪會送走訪客囉? 又或者將 PageRank既Link juice俾左人? 首先External link (去其他站既link)可以開新tab,而Link juice就係另一個題目,我唔會叫你亂咁用”nofollow”去避免link juice流失。信得過既外部連結,係會增加文章既可信度。

SEO文案結構

最後一個SEO文案小技巧,對寫手來講真係易既,就係SEO文案結構。平日我地寫文,都會講「起承傳合」,一環扣一環。不過SEO文章有啲唔同,網上既文唔可以長篇大論,否則讀者會無興趣;但同時網頁字數又唔可以太少,因為唔夠字,SEO係唔會好既。要解決呢個大矛盾,SEO文案寫手就會由文章結構入手,先制定文章大綱,每個部份都有主次標題,兼且可以完整表達一個關鍵論點。以呢篇文為例,我唔會知道你用乜野關鍵字入到來,但就要確保每段文字都可以解答或者滿足到一部份既讀者,你唔使要讀哂成個網頁既字先會拎到你想要既資料。

相對傳統寫作,SEO文章其實好簡單,每個標題都要傳達到一個意思就可以啦。

以上五個2020SEO文案小技巧,相信不單止2020年岩用,2021年都仲ok既。EstherPoni係SEO文案寫手,鐘意將科技同藝術揉合,創作文宣。

  1. Quickly build FAQ pages and get rich results, https://yoast.com/wordpress/plugins/seo/faq-schema-content-block/

發表評論